Informashon pa studiantenan di Aruba, Kòrsou, Sint Maarten i Hulanda Karibense pa inskripshon den Basisregistratie Personen (BRP)

Promé ku bo por kuminsa ku bo estudio komo studiante na Hulanda, tin algun asuntu ku mester regla. Un di eseinan ta e inskripshon den Basisregistratie Personen (BRP, Registrashon básiko di persona). Ora bo bai studia na Hulanda pa un periodo mas largu ku 4 luna, bo mester registrá komo residente den e munisipio kaminda bo ta bai biba. Den e foyeto informativo aki nos ta duna algun tep pa fasilitá e inskripshon na Hulanda. Tuma nota: studiantenan for di Boneiru, Saba i Sint Eustatius ku ta biaha pa Hulanda huntu ku guia, ta haña asistensia ku pasonan 2, 5, 6 i 7.

Paso 1. Kanselá bo inskripshon den e atministrashon di persona (PIVA)

Denter di 10 dia promé ku bo salida, bo ta kanselá bo inskripshon den e atministrashon di persona (PIVA). Esaki bo ta hasi na e departamento di Registro Sivil. E komprobante di kanselashon di inskripshon ta un di e dokumentunan ku bo mester pa e inskripshon na e Basisregistratie Personen (BRP, Registrashon Básiko di Persona) na Hulanda. Na momentu di e kanselashon di inskripshon bo ta indiká na kua munisipio hulandes bo ta bai biba. Departamento di registro sivil ta manda bo fail na e munisipio ei.

Tuma nota: Bo ta inskribí bo mes na un otro munisipio hulandes ku esun ku bo a indiká na momentu ku bo a kanselá bo inskripshon? Esaki por trese un retraso di algun siman kuné pa e inskripshon den e BRP paso mester bolbe manda bo fail na un otro munisipio.

Paso 2. Sita pa inskripshon den e BRP

Promé ku salida informá si ta posibel pa traha un sita pa inskribí den e BRP na e munisipio hulandes kaminda bo ta bai biba, promé ku bo yega Hulanda. Denter di 5 dia despues di yega Hulanda bo mester inskribí bo mes den e BRP na e munisipio kaminda bo ta bai biba. Wak riba e wèpsait di e munisipio si for di promé ku bo salida bo por
traha un sita.

Tep: Puntra na e munisipio kaminda bo ta bai biba òf na e instituto di enseñansa kaminda bo ta bai studia, si nan ta organisá dianan di inskripshon pa studiantenan. Tin bia munisipionan tin sitanan speshal òf dianan di inskripshon pa studiantenan, pa bo inskribí bo mes den e BRP. Tin bia skolnan tambe tin akuerdonan tokante esaki ku e munisipionan.

Paso 3. Dokumentunan pa inskribí den e BRP

Dokumentunan ku semper bo tin mester:

• un pasport bálido
• e komprobante original di e kanselashon di inskripshon di e atministrashon di persona (PIVA).
• e komprobante di e adrès na Hulanda, por ehèmpel un kopia di e kontrato di hür òf un karta firmá i kopia di e karnèt di identifikashon di e habitante prinsipal di e kas, sí e persona ta duna pèrmit pa bo biba den su kas.

Tin bia un munisipio ta pidi tambe pa:

• un sertifikado di nasementu: apliká pa esaki na e departamento di Registro sivil di e lugá kaminda bo a nase. Bai Hulanda ku e akta original. Si bo mayor no a rekonosé bo, bo mester di un sertifikado di nasementu tambe pa por apliká pa finansiamentu di estudio. Bo no a nase den e parti Karibense di Reino? Apliká pa un sertifikado di nasementu (di eksterior) na tempu i den kaso ku esaki ta nesesario laga legalisá i tradusí esaki. Pa mas informashon subi riba riba: nederlandwereldwijd.nl
• pèrmit di bibienda: na sierto munisipio bo mester di un pèrmit di bibienda si bo ta hür un bibienda sosial òf ta bai biba serka un hende ku ta hür un bibienda sosial. Un pèrmit di bibienda bo ta pidi promé ku inskripshon den e BRP na e munisipio.

Paso 4. Formulario pa mas informashon di BSN

Bo a solisitá pa finansiamentu di estudio? Via pòst bo ta risibí di DUO un ‘Bericht studiefinanciering’ (Mensahe di finansiamentu di estudio) i e ‘Formulier bevraging BSN’. (Formulario pa mas informashon di BSN). Bai Hulanda ku e formulario aki.

Paso 5. Inskribí den BRP i risibí BSN

Inskribí bo mes denter di 5 dia despues di bo yegada na Hulanda den e BRP di e munisipio kaminda bo ta bai biba. Traha un sita pa esaki na e munisipio. Un inskripshon den e BRP ta obligatorio si bo ta keda mas largu ku 4 luna na Hulanda. Despues di inskripshon bo ta haña un Burgerservicenummer - BSN (Number di servisio sivil ),
ku bo mester pa apliká pa un Digitale Identiteit – DigiD (Identidat Digital), supsidio adishonal online i pa habri un kuenta di banko hulandes.
Tuma nota: Por dura te ku 4 siman promé ku bo risibí bo BSN di e munisipio. E munisipio ta manda bo esaki via pòst, na e adrès kaminda bo a inskribí.

Paso 6. Habri un kuenta di banko hulandes

Despues ku bo risibí bo BSN, bo por habri un kuenta di banko hulandes. Ta online so bo por habri un kuenta bankario hulandes? Hopi bia bo tin mester di un pasport hulandes e ora ei den kual bo BSN ta indiká. Bo no tin esaki? Traha un sita e ora ei na e ofisina di e banko.

Paso 7. Apliká pa DigiD

Ku un BSN, bo por apliká pa un DigiD, via di e DigiD app òf e ‘Aanvraagformulier DigiD’. Ku un DigiD bo ta mustra ken bo ta i bo por hasi trámitenan online mas fásil, por ehèmpel ku gobièrnu.

Paso 8. Duna DUO bo BSN i number di kuenta bankario

Huntu ku e formulario ‘Bevraging BSN’ duna DUO bo BSN i number di kuenta di banko hulandes. DUO mester di e informashonnan aki pa por asigná bo e produkto di biahe pa studiante i pa bo registrá pa Mijn DUO. Ku e number di kuenta bankario DUO por paga bo e finansiamentu di estudio.

Puntonan di kontakto pa Aruba, Kòrsou i Sint Maarten i Hulanda Karibense

Na kada isla tin un persona di kontakto na e departamento di registro sivil ku por duna studiante informashon tokante inskripshon den BRP i e dokumentonan nesesario:
Aruba:    info@censo.aw
Kòrsou:    info.bsbv@gobiernu.cw
Sint Maarten: burgerzakensxm@sintmaartengov.org
Boneiru:    burgerzaken@bonairegov.com
Sint Eustatius: census.office@statiagov.com
Saba:    censusmail@sabagov.nl

Link i informashonnan útil

Dienst Uitvoering Onderwijs (DUO)

Pa aplikashon pa òf preguntanan tokante finansiamentu di estudio

Wèpsait: duo.nl/antillen

Rijksdienst Caribisch Nederland

Informashon tokante studia na Hulanda i e opstarttoelage (gratifikashon inisial)

rijksdienstcn.com/studiefinanciering
studiefinanciering@RijksdienstCN.com

Arubahuis

E departamento di Enseñansa di Arubahuis (Kas di Aruba) ta duna informashon i instrukshonnan na studiantenan di Aruba promé ku nan sali pa Hulanda. Na Hulanda nan ta yuda ku e akohida i guia di studiantenan ku fiansa pa estudio for di Aruba. Den kada region hulandes tin un mèntòr di estudio ku ta guia e studiantenan.

Wèpsaits:    arubahuis.nl/afdelingen/onderwijs http://www. ea.aw/pages/studia-na-hulanda
E-mail:    info@arubahuis.nl arubalening@ea.aw

Stichting Studiefinanciering Curaçao (SSC)

Na Kòrsou SSC ta atendé ku e aplikashonnan di finansiamentu di estudio pa studiantenan for di Kòrsou. Na Hulanda e departamento ta sòru pa akohida, guia i bibienda pa e studiantenan. Kada region di Hulanda tin mèntòrnan ku ta guia e studiantenan.

Wèpsait: http://www.ssc.cw E-Mail : info@ssc.cw

Dienst Studiefinanciering St. Maarten (DSF)

DSF ta regla e finansiamentu di estudio adishonal pa e studiantenan for di Sint Maarten. Na Hulanda tin mèntòrnan i “buddy’s” ku ta asistí i guia e studiantenan ku un fiansa di estudio.

Wèpsait: https://studyfinancing-sxm.com/
E-mail adrès: info@studyfinancing-sxm.com

Klik aki pa e pdf