Informashon pa studiantenan di Aruba, Kòrsou, Sint Maarten i Hulanda Karibense

Den e foyeto informativo aki nos ta duna algun tep pa fasilitá e inskripshon na Hulanda.

Kanselashon di inskripshon PIVA: mester di prueba di kanselashon di inskripshon

Promé ku bo sali pa Hulanda, bo mes mester bai kanselá bo inskripshon den e atministrashon di persona (PIVA) na departamentu di registro sivil di e isla kaminda bo ta biba. Esaki bo ta hasi denter di dies dia promé ku bo salida. Ta importante ora bo bai kansela bo inskripshon den PIVA pa bo indiká na kua munisipio na Hulanda bo ta bai biba, di moda ku e departamentu di registro sivil por manda bo fail na e munisipio ei. Ora bo yega Hulanda, bo mester inskribí bo mes na e munisipio kaminda bo ta bai biba.
Si dado kaso bo bai biba na un otro munisipio ku esun ku bo a indika na bo salida tene kuenta ku esaki por trese un retraso di algun siman kuné ku inskripshon den e BRP.

Kanselashon di inskripshon den PIVA ta un kondishon pa por inskribí den e BRP. Un di e dokumentonan ku bo mester entregá ora di inskripshon ta e aviso di mudansa (komprobante di kanselashon). Bo ta risibí esaki huntu ku bo kanselashon di inskripshon.

Inskripshon den BRP: kon i kua dokumentu

Ora ku bo yega Hulanda bo mester inskribí komo residente denter di 5 dia den e munisipio kaminda bo ta bai biba. Ta rekomendabel pa informá serka e munisipio konserní promé ku bo salida si bo mester traha un sita i kua dokumentonan bo tin mester pa bo inskripshon. Den mayoria kaso bo por haña e informashon aki riba wèpsait di e munisipio.
Despues di inskripshon komo residente den e munisipio kaminda bo a bai biba, por tarda te ku 4 siman promé ku bo risibí bo burgerservicenummer (BSN, number di servisio sivil) di e munisipio. Bo mester di un BSN entre otro pa pidi finansiamentu di estudio na Hulanda, sera un seguro médiko i pa habri un kuenta di banko hulandes.
Ora di inskripshon den e BRP na e munisipio bo mester trese en todo kaso e siguiente dokumentonan:

• Un pasport bálido (pa determiná bo identidat)
• Un komprobante di kanselashon di inskripshon original (ku bo a risibí di e departamentu di registro sivil di e isla kaminda bo a kanselá bo inskripshon)
• Komprobante di adrès na Hulanda (por ehèmpel un kopia di e kontrakt di hür òf un karta firmá i un kopia di e karnèt di identifikashon di un miembro di bo famia serka ken bo por biba temporal)
• Opshonal: kopia di sertifikado di nasementu (sierto munisipio ta pidi un kopia di bo sertifikado di nasementu).

Informá di antemano si e munisipio ta pidi un sertifikado di nasementu. Tuma nota: Bo por aplika pa un sertifikado di nasementu solamente na e isla of pais kaminda bo a nase. Pues ora bo ta biaha di un isla kaminda bo no a nase, ta bon pa apliká pa e sertifikado di nasementu (di eksterior) na tempu i si ta nesesario pa laga tradusí esaki i, ora ta nesesario, pa bo laga legalisá esaki, òf laga pone un stèmpel di apostille (legalisashon) riba esaki.
 

Dia spesial di munisipio pa inskribí

Tin munisipio ku ta apliká dianan fiho òf sita spesial pa inskripshon di studiantenan for di region Karibense na Burgerzaken/Publiekszaken. Ademas tin sierto instituto di enseñansa ku tin akuerdo ku munisipionan tokante dianan spesial di inskripshon. E asuntunan aki ta diferente pa kada munisipio i tambe pa kada instituto di enseñansa. Informá serka bo instituto di enseñansa òf serka e munisipio tokante e dianan spesial di inskripshon aki.

Dianan pa studiante di institutonan di enseñansa

Lo bo mester a regla bo inskripshon serka e instituto di enseñansa kaminda bo ta bai studia, promé ku bo salida pa Hulanda kaba. Informá di antemano, por ehèmpel via wèpsait di e instituto di
enseñansa, si nan ta ofresé guia ora di inskripshon den e BRP na Hulanda. Tin dianan spesial pa studiante kaminda diferente instansia ta presente, manera Burgerzaken/Publiekszaken (departamento di asuntunan sivil i públiko). Naturalmente bo por akudí tambe pa informashon serka e organisashonnan i personanan menshoná abou.
Puntonan di kontakto pa Aruba, Kòrsou i Sint Maarten i Hulanda Karibense:
Na kada isla tin un persona di kontakto na e departamento di registro sivil ku por duna studiante informashon tokante inskripshon den BRP i e dokumentonan nesesario:

• Aruba: info@censo.aw
• Kòrsou: info.bsbv@gobiernu.cw
• Sint Maarten: burgerzakensxm@sintmaartengov.org
• Boneiru: burgerzaken@bonairegov.com
• Sint Eustatius: census.office@statiagov.com
• Saba: censusmail@sabagov.nl

Informashon hèndi i lenknan:

Dienst Uitvoering Onderwijs (DUO)

Informashon tokante finansiamentu di estudio pa studiantenan for di region Karibense.
Wèpsait: duo.nl/antillen

Rijksdienst Caribisch Nederland

Aki bo ta haña informashon tokante entre otro opstarttoelage (gratifikashon inisial). E opstarttoelage tin komo meta pa yuda paga e pasashi, ekipo (tur loke ta nesesario pa e biahe i estadia na Hulanda), mobilario, transishon i guia na Hulanda. E opstarttoelage ta parsialmente beka di prestashon i parsialmente fiansa.
Wèpsait: rijksdienstcn.com/studiefinanciering
E-mail adrès: studiefinanciering@RijksdienstCN.com

Arubahuis

E departamento di Enseñansa di Arubahuis tin e responsabilidat pa e studiantenan arubiano ku tin un fiansa di estudio di pais Aruba. E departamento aki ta sòru pa e akohida i guia di e studiantenan arubiano ku ta bin Hulanda pa studia. Kada region den Hulanda tin un mèntòr ku ta supervisá un sierto kantidat di studiante.
Wèpsaits: arubahuis.nl/afdelingen/onderwijs http://www.ea.aw/pages/studia-na-hulanda
E-mail: info@arubahuis.nl
arubalening@ea.aw

Stichting Studiefinanciering Curaçao

Stichting Studiefinanciering Curaçao (SSC) ta un instituto di finansiamentu ku ta enkargá ku finansiamentu di estudio pa sigui un estudio na nivel di MBO, HBO òf WO na Kòrsou i Hulanda.
E ofisina prinsipal na Kòrsou ta sòru pa e intake, aplikashon, seguro, pago di e finansiamentu di estudio mensual i e kobramentu di e debe di estudio serka studiantenan.
E departamento na Hulanda ta sòru pa e akohida, guia i alohamentu pa e studiantenan na Hulanda. Kada region den Hulanda tin un òf mas mèntòr ku ta duna guia na un kantidat di studiante.
Wèpsait: http://www.ssc.cw
E-Mail : info@ssc.cw

Dienst Studiefinanciering St. Maarten (DSF)

DSF ta e órgano di ehekushon denter di e Ministerio di Enseñansa, Kultura, Hóben i Deporte enkargá ku suministro di finansiamentu di estudio adishonal pa sigui un estudio di MBO, HBO òf WO na Hulanda.
Un tim di mèntòr i ‘buddy’ ta duna sosten i guia na e studiantenan ku ta bin di Sint Maarten i ku ta bai studia na Hulanda ku finansiamentu di estudio di pais Sint Maarten.
Wèpsait: https://studyfinancing-sxm.com/
E-mail adrès: info@studyfinancing-sxm.com

Mas pregunta?

Si bo tin pregunta tokante inskripshon na Hulanda, bo por tuma kontakto ku nos frontoffice via e-mail info@rvig.nl òf via telefòn riba number di telefòn 088 900 1000.